Na véspera do Día da Biblioteca, Bóveda recibiu un importante recoñecemento polo seu traballo por achegar a lectura aos diversos colectivos sociais. O 23 de outubro, tivo lugar a entrega do III Premio á Innovación Bibliotecaria de Galicia, que este ano correspondeulle á Biblioteca Pública Municipal de Bóveda.
BIBLIOTECA INNOVADORA
O galardón, que concede a Xunta de Galicia a través da Consellería de Cultura, recoñeu o traballo de integración levado a cabo pola Biblioteca de Bóveda cos usuarios da residencia para persoas con discapacidade funcional. A dotación do único premio da convocatoria é de 3.000 euros e un distintivo de biblioteca innovadora.
INTEGRACIÓN CULTURAL E «ÉXITO COLECTIVO»
O alcalde de Bóveda, José Manuel Arias, recolleu o premio de mans do secretario xeral de Cultura, Anxo M. Lorenzo. Arias destacou que este traballo de integración agora recoñecido «comezou hai xa algúns anos», con iniciativas como o Club de Lectores para adultos, a adquisición de fondos bibliográficos e audiovisuais adaptados ás necesidades dos usuarios, e tamén mellorando a accesibilidade ao edificio. Todo isto, para facer da lectura «un vínculo de integración cultural».
Na súa intervención, o alcalde agradeceu o esforzo de todas as persoas que fixeron posible esta iniciativa, con mención expresa á concelleira de Cultura, Cristina Juiz, presente no acto; á técnica sociocultural do Concello, Miriam Palmón; e ás educadoras, animadoras e persoal da residencia, ademais da colaboración do CEIP Rosalía de Castro.
Arias destacou que este labor, ademais de transformar a Biblioteca «nun espazo accesible e exemplo de innovación», logrouse «integrar aos membros da residencia como veciños e veciñas do Concello de Bóveda», feito que cualificou de «éxito colectivo». •
Cargando ...
