A dotación de fondos da Consellería para os ARI desta anualidade ascende en Monforte aos 100.400 euros
A comezos de novembro, quedou asinado o convenio entre o Concello de Monforte e a Consellería de Medio Ambiente, Territorio e Vivenda para a dotación de fondos con destino á Área de Rehabilitación Integral (ARI). Para esta anualidade, Monforte de Lemos disporá de 100.400 euros, aínda que ten en marcha a execución de anteriores convenios desta mesma categoría por un importe global de 322.000 euros.
PARA PROPIETARIOS DE VIVENDAS E PARA OBRAS DOS CONCELLOS EN ZONA ARI
Dende a Consellería informaron de que as axudas van destinadas a propietarios de vivendas e edificios residenciais situados no entorno establecido como área de rehabilitación integral. En Monforte, este ámbito corresponde ao conxunto histórico e zonas de respecto. Ademais, tamén poden optar a estas axudas ARI os propios concellos, no caso de actuacións de urbanización ou reurbanización dentro dos espazos ARI. Aparte, a Xunta financia con fondos propios as oficinas de rehabilitación municipais. Os Concellos son as entidades encargadas de tramitar a convocatoria pública das axudas ARI, para que os particulares que estean interesados poidan presentar as solicitudes. •
