Os sucesivos documentos que a Xunta está a elaborar para regular as diferentes actividades nestes tempos de pandemia chegan tamén ás tarefas tradicionais, provocando reaccións por parte dos colectivos sociais. Dende a plataforma Interior Vivo Galego criticaron as recomendacións propostas pola Xunta para evitar contaxios por covid-19 nas matanzas, afirmando que foron pensadas «para un espazo de administración tipo oficina e son totalmente xenéricas».
«TOMADURA DE PELO» NUN DOCUMENTO «REDACTADO SEN COÑECER O TERRITORIO»
Dende o colectivo cualificaron o documento como «unha verdadeira tomadura de pelo para quen non sabe o que é agarrar un porco, estremar as tripas ou picar a carne para facer zorza». Os voceiros da plataforma Interior Vivo Galego consideran que «perdería o tempo» a xente do rural que aínda fai matanzas se leran a guía preparada pola Xunta. O documento, segundo a plataforma, é «unha mostra máis do que é a política deste país», que consideran «redactada e aprobada dende oficinas de Santiago sen coñecer en absoluto o territorio».
RECOMENDACIÓNS PARA UNHA MATANZA SEGURA
Por este motivo, os responsables de Interior Vivo Galego fixeron públicas algunhas recomendacións «aplicando o sentido común que lles falta aos da capital». A relación de medidas comeza pola redución dos participantes na matanza «ao mínimo indispensable», empregando en todo momento a máscara, e gardando no posible a distancia de seguridade. Recoméndase tamé que cada tarefa sexa realizada sempre pola mesma persoa. Estes consellos refiren sempre ao marco normativo das autoridades sanitarias, insistindo en que «se o concello está baixo feche perimetral non debería facerse a matanza, a non ser que fagan a figadeira só os da casa».
Por outra banda, dende a plataforma a hixiene de mans, ter os locais ben ventilados e incluso levar a cabo ao aire libre «todas as actividades que se poidan». Ademais, recomendan «non usar rollas ou partillar apeiros e obxectos», dispoñer de papel para secar as mans e desbotalo nun balde con pedal.
Por último, dende Interior Vivo Galego insisten en «evitar a exposición e a participación das persoas maiores ou grupos de risco». •
