O Concello do Saviñao vai premiar a creatividade dos máis cativos aproveitando que o Nadal está ás portas. Dende o Consistorio convocaron o concurso de postais “O Nadal no Saviñao”, dirixido aos escolares dos colexios de Escairón e Currelos. O prazo de entrega rematou a mediados de novembro, polo que o xurado previamente constituído xa está a traballar na valoración e selección dos deseños presentados a concurso.
CINCO CATEGORÍAS DE PREMIOS
A organización do concurso estableceu cinco categorías de premios. A primeira vai dirixida ao alumnado dos cursos 4º, 5º e 6º de educación infantil. Na segunda categoría, etiquetada como Primaria A, valoraranse os traballos presentados polo alumnado de 1º, 2º e 3º de primaria. Unha terceira categoría, denominada Primaria B, terá en conta os debuxos achegados polos escolares de 4º, 5º e 6º de primaria. Para os estudantes dos cursos de Educación Secundaria Obrigatoria, estableceuse unha categoría aparte para valorar os seus traballos.
NO CALENDARIO DE NADAL DO CONCELLO
Por último, o concurso premiará unha única postal como gañadora absoluta das catro categorías. Esta postal será publicada no Calendario de Nadal que edita o Concello do Saviñao.•
