A pandemia está a condicionar as dinámicas de ocio, e na busca de opcións seguras para o tempo libre, a Área de Cultura da Deputación, dependente da Vicepresidencia, puxo en marcha unha experiencia de cine ao aire libre para desfrutar en familia. O Autocine animou varias tardes de fin de semana en Lugo e Sarria, cunha carteleira deseñada polos propios usuarios, que votaron a través das redes sociais as películas máis demandadas. O plantel estivo formado por títulos de carácter familiar, como «Pérez 2» ou «Los Goonies», e outros filmes de carácter máis xeralista, como «Gran Torino» ou «Pulp Fiction».
As proxeccións visualizáronse dende o propio coche, previa recollida da entrada por internet, cunha pantalla de 24 metros cadrados e co son conectado ao vehículo por FM. Só se permitiu o acceso nos coches a grupos de persoas convivintes. •
