•A empresa Comfica encárgase dos traballos de conservación da rede viaria de titularidade provincial nos concellos agrupados na zona 7
A conservación e mantemento en boas condicións das estradas de titularidade da Deputación de Lugo permanece activa ao longo de todo o ano. Nos concellos de Folgoso do Courel, O Incio, Samos, Triacastela, Quiroga e Ribas de Sil, con 313 quilómetros que integran a denominada zona 7, a empresa Comfica é a concesionaria da Deputación de Lugo para levar a cabo estes traballos, cun investimento aproximado de 220.374 euros.
Comfica ten activado un equipo humano e material composto por unha decena de profesionais especializados en obra pública, entre os que se atopan nove oficiais, un encargado e un xefe de obra. En canto ao aspecto técnico, a concesionaria dispón dun operativo de vehículos e complementos específicos para realizar tarefas de retirada de neve e estendido de fundentes, así como de limpeza de cunetas e aplicación de rego asfáltico en todos os concellos que integran a zona 7.
Entre as intervencións máis recentes para a mellora do firme, destacan o acondicionamento con aglomerado en quente en máis de 1.000 metros de vial ao longo do Concello de Samos, e tamén nunha extensión de 1.300 metros na estrada LU-P-5601, no término municipal de O Incio.•
Cargando ...
