• Coas obras, inténtase «devolver a este espazo o carácter de pequena praza» para que quede «totalmente diáfana e humanizada», segundo explicou o alcalde
No último tramo do mes de xaneiro, botaron a andar as obras de humanización da Praza Doutor Goyanes de Monforte, un proxecto do Concello «para devolverlle o carácter de pequena praza» que tivo dende a súa construción, no primeiro terzo do século XX. Vinculada ao edificio singular do Hotel Comercio, nesta praza conflúen seis das rúas máis comerciais do centro urbano: Comercio, Dr. Casares, o Malecón, a rúa das Hortas, a Ponte Vella, Armando Cotarelo e Abelardo Baanante.
A idea que busca o Concello con estas obras é eliminar as barreiras que ten agora a praza en forma de muretes e escaleiras, para recuperar a continuidade da rasante. Logo desta operación, procederase á renovación de todo o pavimento, e á humanización do espazo, mediante a colocación de árbores e bancos.
RESPECTO Á ZONA BIC DO CASCO HISTÓRICO
Como obxectivos desta intervención, o Concello quere mellorar as condicións de estancia nesta praza, de marcada natureza peonil e segundo o vixente código de accesibilidade. Tamén se pretende respectar o carácter BIC deste espazo dentro do casco histórico de Monforte, mediante o emprego de materiais construtivos acordes con este tipo de paisaxe urbana. •
