• Este ano, os fondos ascenden a 3,5 millóns de euros • No pasado exercicio, beneficiáronse destas achegas un total de 80 negocios en toda Galicia
A aposta polo Xacobeo e o impulso económico e dinamizador das áreas rurais son algúns dos obxectivos da nova liña de achegas da Xunta para arranxar infraestruturas en establecementos turísticos. Segundo referiu o vicepresidente primeiro da Xunta, Alfonso Rueda, a partida global suma 3,5 millóns de euros para este ano, un incremento do 133% respecto ao exercicio anterior.
Rueda aproveitou a visita ao establecemento rural «A avoa María», situado en Campo Lameiro, para lembrar que o ano pasado foron 80 os negocios deste tipo que se beneficiaron da liña de axudas para a mellora de establecementos turísticos.
O titular autonómico salientou que esta financiación permitirá aos beneficiarios «presentar unha oferta turística competitiva e de calidade, sobre todo neste Xacobeo». Con esta intención, o Executivo autonómico incrementou o máximo que pode recibir cada solicitante, ata acadar os 50.000 euros, fronte aos 35.000 de máximo aos que se podía acceder o ano pasado.·
