Este mes, deuse a coñecer o proxecto «O Camiño que nos une», organizado pola Asociación de Amigos do Camiño de Santiago da provincia de Lugo, que conta co apoio do programa O Teu Xacobeo da Xunta de Galicia. A iniciativa conta coa participación de oito destacados deportistas lucenses, que visitarán outros tantos centros educativos da provincia para promover os valores de igualdade e inclusión, ademais do impulso das rutas xacobeas en terras lucenses e o seu impacto positivo na contorna.
OITO MULLERES DEPORTISTAS NO PROXECTO
A listaxe de deportistas que participarán no programa «O Camiño que nos une» inclúe á atleta monfortina Saleta Fernández, xunto a xogadora profesional do Pescados Rubén Burela Futsal Lara Balseiro; a xogadora de volei Nuria Bouza; a atleta Alessandra Aguilar; a piragüista Tania Fernández; a judoka Sara Álvarez; a atleta Adiaratou Iglesias; e Hilda Rodríguez, a primeira deportista galega en acadar unha medalla en Xogos Paralímpicos.
Os encontros das deportistas co alumnado da zona sur terán lugar nos centros IES do Camiño de Palas de Rei, o IES Francisco Daviña Rey de Monforte e o IES Lama das Quendas de Chantada.
Na presentación do programa, os responsables da Xunta lembraron que O Teu Xacobeo leva destinados case 8 millóns de euros para apoiar 400 proxectos nas dúas edicións. Na provincia de Lugo, mobilizáronse 400.000 euros en 24 propostas vinculadas a 21 municipios. •
