O alcalde de Sober estivo presente no anuncio oficial, xunto á conselleira de Medio Ambiente e representantes doutros municipios
Sober estivo representado no anuncio do inminente desenlace da candidatura da Ribeira Sacra a Reserva da Biosfera pola Unesco. O alcalde de Sober, Luis Fernández Guitián, participou no acto organizado este mes pola Xunta no Saviñao, fronte ao Cabo do Mundo, e no que participaron tamén a conselleira de Medio Ambiente, Territorio e Vivenda, Ángeles Vázquez; o alcalde do Saviñao, Carlos Armesto; e a directora xeral de Patrimonio Natural, Belén do Campo.
O TERRITORIO FOI INCLUÍDO NA PROPOSTA INICIAL A PETICIÓN DA XUNTA
A conselleira anunciou que o acto de proclamación dos territorios como Reserva da Biosfera pola Unesco estaba previsto para o mes de xuño en Nixeria, pero que o comité español da Unesco vén de comunicar o seu aprazamento para o final de verán, debido á situación da pandemia a nivel mundial.
Vázquez salientou que, inicialmente, a Ribeira Sacra non estaba incluída nos territorios propostos para esta candidatura, polo que o Executivo galego solicitou unha rectificación por parte do Goberno central, como finalmente se fixo. Esta inclusión como Reserva da Biosfera suporá para Galicia, segundo precisou a conselleira, a recepción de fondos “axeitados e acordes” á dimensión das reservas da comunidade.
A conselleira puxo como obxectivo “conseguir a tripla coroa da Unesco”, logo do recoñecemento do Xeoparque Montañas do Courel e a candidatura da Ribeira Sacra a Patrimonio da Humanidade.•
Cargando ...
