Aberto o prazo para descargar os bonos desconto da Xunta de Galicia

A Xunta de Galicia ten xa aberto o prazo para que os galegos poidan descargar os bonos desconto para consumir no comercio a través da iniciativa Bonos Activa Comercio, que impulsa a Vicepresidencia Segunda e Consellería de Economía, Empresa e Innovación. O obxectivo é reactivar o comercio local dinamizando as vendas nos establecementos de proximidade.
O programa conta cun orzamento de 10 millóns de euros, cos que se prevé mobilizar 55 millóns neste sector, e chegar a 330.000 clientes a través de bonos desconto de 30 euros. Os consumidores que o desexen deberán rexistrarse na web www.bonosactivacomercio.gal, e poderán descargar os bonos desconto de 30 euros a través dunha aplicación móbil. O importe de cada bono irase consumindo en función do valor da compra. Así, as compras iguais ou superiores a 30 euros terán un desconto de 5 euros, mentres que ás compras iguais ou superiores a 50 euros lles corresponde un desconto de 10 euros.
A mediados de maio, hai máis de 2500 establecementos adheridos que contan cun distintivo que os identifica como participantes neste programa. O sector que suma un maior número de negocios é o de vestido e toucado; seguido do de calzado, artigos de pel e imitación ou produtos substitutivos, cintos, carteiras, bolsos, maletas; así como material e aparellos eléctricos, electrónicos ou electrodomésticos.
Os Bonos Activa Comercio forman parte do paquete de medidas que a Xunta está a poñer en marcha para reactivar o comercio de proximidade, e que contará con polo menos 20 millóns de euros en axudas para reforzar a competitividade do sector a través de iniciativas que permitan a súa modernización e incentiven o consumo.•