Na Biblioteca Anxel Casal de Santiago de Compostela, tivo lugar estes días a presentación do cómic «Camiño de Santiago. A aventura xacobea de Simón Martel», de Fausto Isorna, coa participación de Nava Castro, directora de Turismo de Galicia, e de Valentín García, secretario xeral de Política Lingüística. O autor, Fausto Isorna, é un dos autores máis destacados no mundo da banda deseñada galega, e a súa serie de aventuras de Simón Martel é a máis lonxeva das súas características en Galicia.
Nesta ocasión, a publicación de Isorna xira arredor do Camiño de Santiago, o que a converte nun interesante material didáctico para achegar as Rutas Xacobeas aos máis pequenos. A obra, editada por El Patito Editorial, da que o propio Isorna é director artístico e alma mater xunto coa súa muller, a guionista e divulgadora Gemma Sesar, reflexa a vocación do autor polo coidado e calidade dos debuxos, e o seu interese polas historias de aventuras, nas que pode adiviñarse a influencia de Hergé e o seu personaxe cume, Tintín, nun traballo que vén dar continuidade ás andanzas de Simón Martel, creadas hai máis de 20 anos das mans de Isorna, Méndez e Malvar.•
