A unión temporal de empresas presentada como “María Isabel Álvarez Sangil, Ruth Díaz Amor, Vicente Parra Vizcaino e Albergue Santiago 15, S.L,” resultou adxudicataria na licitación para a explotación dos servizos que se prestan no Espazo expositivo do Centro do Viño da Ribeira Sacra, na Oficina de Turismo, na futura Oficina de Atención ó Peregrino e das visitas á Torre da Homenaxe. A explotación destas instalacións, dependentes do Concello de Monforte de Lemos, adxudicouse este mes por un prezo total de 203.885 euros, con impostos incluídos.
ABERTOS TODO O ANO
Segundo informaron dende o Consistorio monfortino, a empresa adxudicataria contará con persoal especializado e con formación contrastada. Así mesmo, no contrato especifícase que tanto a Oficina de Turismo, como o Espazo expositivo do Centro do Viño, a súa tenda e a Oficina do Peregrino, estarán abertos todos os días da semana ó longo de todo o ano.
O alcalde, José Tomé, sinalou que “con esta única xestión integral haberá un antes e un despois na xestión dos nosos servizos turísticos municipais, que redundará moi positivamente na imaxe e na información que trasladaremos de Monforte e da Ribeira Sacra ós nosos visitantes e peregrinos”.•
Cargando ...
