A Deputación de Lugo puxo en marcha estes días o programa Actívate, unha iniciativa que busca promover o turismo activo, científico e de mindfulness nos concellos da provincia.
A deputada de Réxime Interior, Promoción do Territorio e Turismo, Pilar García Porto, celebrou «o éxito» dunha convocatoria que “nas dúas primeiras fins de semana esgotou prazas en moi pouco tempo, o que fai pensar que o turismo de calidade, non masificado, sostible e de proximidade, polo que apostamos dende a institución provincial, interesa aos veciños e veciñas da provincia de Lugo”.
“Con esta iniciativa, dende a Deputación queremos axudar á recuperación da economía, e tamén promover un lecer seguro en tempos de restricións de mobilidade”, destacou a deputada socialista.
PRAZO ABERTO
As persoas interesadas en participar no programa Actívate da Deputación aínda poden inscribirse, a través da web do organismo provincial, nas diversas actividades previstas para a segunda quincena de maio. O día 15, terá lugar unha ruta de sendeirismo na Fervenza de Augacaída, en Pantón e o 16 haberá unha camiñata entre viñedos ao carón do Canón do Sil, en Sober.
Xa o día 22, terá lugar a actividade «O Courel, onde as forzas xeolóxicas dobraron as montañas», no municipio de Quiroga, mentres que o día 23 desenvolverase un curso de iniciación ao ioga en Mondoñedo. Pola súa banda, o 29 de maio en Cervantes terán lugar os baños de bosque nos Ancares, e o 30 está prevista a actividade «En bici pola Vía Verde e montes na vila dos Fornos», na Pontenova. •
Cargando ...
