• O convenio entre a Consellería de Sanidade, o Sergas e o Colexio de Farmacéuticos de Lugo inclúe a máis do 80% das oficinas de farmacia na provincia
Dende finais deste mes, un total de 151 farmacias de toda a provincia de Lugo realizan de balde test PCR de saliva para a detección de covid-19. Esta medida, que arrancou como proba piloto nunha farmacia de Sarria o 20 de maio, xa funciona dende o día 24 en máis do 80% das farmacias da provincia. O delegado territorial da Xunta en Lugo, Javier Arias, precisou que aínda está aberto o prazo para que as farmacias que o desexen poidan incorporarse a este programa. A iniciativa é o resultado do convenio asinado entre a Consellería de Sanidade, o Sergas e o Colexio de Farmacéuticos de Lugo.
Arias explicou que o obxectivo deste programa é a detección do covid-19 en pacientes asintomáticos, para proceder á localización e illamento dos seus contactos estreitos, co fin de romper a cadea de expansión do virus. O delegado sinalou que estas probas de saliva están dirixidas á poboación lucense entre 12 e 64 anos, que poderá pedir a proba presentando a súa tarxeta sanitaria e de xeito totalmente gratuíto. As farmacias entregarán aos usuarios un kit para a recollida de mostras, e trala realización da análise no laboratorio de Microbioloxía de Vigo, comunicarán o resultado por SMS. En caso de dar positivo, realizarán unha PCR nasofarínxea. •
