O Concello licita a mellora dun camiño público do polígono do Reboredo

Anuncio da licitación do camiño do Reboredo. Na imaxe, o alcalde, acompañado da tenente de alcalde, Gloria Prada, e do concelleiro de Servizos, José Luis Losada. GPCM

A mediados de mes, o alcalde anunciou unha nova actuación en materia urbanística, referida desta volta ao polígono industrial do Reboredo. O proxecto, explicado polo rexedor, José Tomé, consiste na mellora e ampliación dun camiño público existente nesta superficie industrial, co fin de convertelo nunha nova rúa que vai favorecer o desenvolvemento e a ampliación de dito polígono.

TOMÉ: RESULTADOS «EXCELENTES» DAS MEDIDAS MUNICIPAIS, XA QUE A VENDA DE PARCELAS ESTÁ «PRACTICAMENTE ESGOTADA»
Tomé salientou que «dende o Concello, apostamos claramente polo desenvolvemento deste polígono, tanto nas infraestruturas viarias como nos servizos de mellora de alumeado, mellora de abastecemento de auga, e melloras no saneamento e promoción diante do tecido empresarial». O rexedor monfortino precisou que estas medidas emprendidas polo Goberno local «están dando uns excelentes resultados, dado o nivel de venda de parcelas que está practicamente esgotado».
CAMIÑO MUNICIPAL QUE PASA A SER UNHA RÚA DE 16,50 METROS DE ANCHURA TOTAL
O rexedor explicou as características do proxecto que se vai licitar. O camiño, de titularidade municipal, presenta un firme de terreo vexetal con zonas moi húmidas. A mellora suporá a eliminación da vexetación e a restauración do firme, e ademais vaise ampliar cara ao ser lado oeste. Os treitos nos que se vai actuar suman 8.503 metros cadrados de superficie, e case medio quilómetro de lonxitude.
A futura rúa terá, no seu tramo principal, unha calzada de 7 metros de ancho, con dous carrís de 3,50 metros, completada con dous aparcamentos a ambos lados da rúa de 2,25 metros. Por cada lado, tamén se construirán beirarrúas de 2,50 metros. No segundo tramo, perpendicular ao primeiro, vaise construír para dar acceso á rotonda. Este tramo terá o mesmo ancho total que o primeiro, cunha calzada de 9 metros, con dous carrís de 4,50 metros, e dúas beirrarúas laterais de 3,74 metros cada unha.•

Un documental porá en valor o tecido empresarial de Monforte

O Concello de Monforte é o principal patrocinador do documental titulado «Monforte de Lemos, Vía Sacra», co que se trata de promocionar a actividade económica e empresarial da cidade do Cabe, «especialmente nun momento no que a incidencia da covid-19 segue a estar moi presente na nosa sociedade».
A peza documental, elaborada en formato cine, recolle unha selección de 22 proxectos empresariais vinculados a Monforte de Lemos. Estes negocios son os protagonistas desta película, segundo explicaron dende o Consistorio, ao servir de mostra representativa da actividade económica do municipio. O alcalde agradeceu a colaboración destas empresas para participar no proxecto e actuar tamén como copatrocinadores. «No documental, imos visibilizar o esforzo, o traballo e a ilusión que os empresarios e empresarias desta terra adican no seu día a día».
Para dar a coñecer o documental, o Concello organizou un acto de presentación na Praza da Compañía, na tarde do venres 23 de xullo, de carácter gratuíto pero con aforo limitado, polo que require reserva previa.. O evento contará coa actuación da artista internacional e natural de Monforte Rosa Cedrón, e coa participación do alcalde, José Tomé, e o director da produtora do documental, Ignacio Seijo. •

Deixa unha resposta

Your email address will not be published.

Nova Anterior

Seguinte Nova

Executado o 25% da primeira fase da autovía Nadela-Sarria

Últimas noticias sobre ECONOMÍA

   
A %d blogueros les gusta esto: