•A aplicación permite que o visitante «sexa partícipe da xestión sustentable e eficiente da Ribeira Sacra»
O Consorcio de Turismo Ribeira Sacra ten activada unha aplicación para que os visitantes poidan comunicar incidencias relativas á accesibilidade e ao mantemento dos puntos de interese turístico. Esta aplicación, elaborada polo Consorcio coa colaboración da Axencia Turismo de Galicia, está dispoñible na web turismo.ribeirasacra.org.
A aplicación identifica o recurso turístico por xeolocalización automática do punto onde se atopa o visitante co seu terminal, ou ben por localización do recurso sobre un mapa. Tamén se pode localizar empregando un buscador e introducindo o nome do lugar ou recurso. Unha vez notificada a incidencia, o Consorcio trasladará este dato ao responsable da xestión do recurso, e fará seguemento do proceso de solución. Así mesmo, o Consorcio manterá informado ao visitante sobre a intervención, para contribuír á boa imaxe do xeodestino.•
