Durante os meses de verán, a Xunta está a executar diversos traballos de mellora nos centros educativos da provincia. En Bóveda, a Consellería de Cultura, Educación e Universidade vén de rematar unha das fases do proxecto de reforma do CEIP Rosalía de Castro. O mes pasado, quedaban completadas as obras de instalación dun baño no interior dunha aula de Educación Infantil, así como a ampliación da biblioteca e a colocación de novas ventás na fachada leste e oeste, para garantir un mellor illamento e incrementar a eficiencia enerxética. Por último, incorporouse unha rampla para mellorar a accesibilidade ao centro educativo.
REFORMA INTEGRAL DA COCIÑA NUNHA SEGUNDA FASE
Na súa visita ao colexio de Bóveda para supervisar as obras, o delegado da Xunta na provincia, Javier Arias, informou de que se van realizar novas actuacións neste centro. O proxecto incluirá a reforma da cociña, na que se substituirán as instalacións de gas, fontanería e saneamento, así como os acabados das paredes e do chan.
MÁIS MELLORAS
A maiores, Arias anunciou que se están valorando novas intervencións neste colexio para os vindeiros meses. O delegado fixo referencia ao Plan de Nova Arquitectura Pedagóxica, que ten como obxectivo habilitar centros de ensino máis sustentables e respectuosos co medio ambiente, ademais de incorporar outras leccións aprendidas coa experiencia da pandemia.•