•Na reunión con Tomé, Fernando Valdés adiantou que se vai traballar en novas experiencias turísticas que potencien Monforte
Monforte acolleu, a finais do mes pasado, a visita do secretario de Estado de Turismo, Fernando Valdés Verelst, resultado da invitación feita polo alcalde, José Tomé, durante a celebración da feira FITUR en Madrid a comezos de ano. Na reunión mantida na cidade do Cabe, ambos representantes públicos analizaron «as posibilidades de colaboración entre a Secretaría de Estado de Turismo e o Concello para poñer en valor o casco histórico importantísimo que temos, así como os seus elementos singulares, que teñen unha proxección turística moi importante”, explicou Tomé. O rexedor afirmou que, con esta visita, abriuse un espazo de diálogo para iniciar actuacións «de cara á conservación do patrimonio, e que ese patrimonio potencie o atractivo turístico de Monforte e do conxunto da Ribeira Sacra».
Pola súa parte, Fernando Valdés fixo referencia ao Plan de Modernización y Competitividad del Sector Turístico, dotado con 3.400 millóns de euros de fondos europeos. Este Plan, segundo o secretario de Estado de Turismo, «dispón de recursos para abordar a posta en valor do patrimonio de Monforte como expoñente en canto ó patrimonio de uso turístico». Valdés insistiu en que hai que «valorar conxuntamente as opcións para empezar a xerar experiencias turísticas» neste territorio, «aproveitando a súa capacidade en gastronomía, enoturismo e patrimonio natural e cultural».•
Cargando ...
