• Redacción- MONFORTE.
O legado artístico de Manuel Jorge está cada vez máis cerca de contar cun emprazamento propio na vila do Asma. Así o anunciaron os responsables da Asociación Amigos de Manuel Jorge de Chantada, durante a celebración do concerto-homenaxe ao artista que se celebrou no Auditorio Municipal o 3 de setembro. O evento musical serviu para poñer o broche de ouro á exposición “Seis décadas de retrato”, que estivo aberta no Auditorio do 13 de agosto ao 5 de setembro.
O MUSEO DE ARTE CONTEMPORÁNEA EN CHANTADA, “O SOÑO DE MANUEL JORGE”
No concerto-homenaxe, cun Auditorio a rebosar de xente dentro das restricións pola pandemia, a presidenta da Asociación Amigos de Manuel Jorge de Chantada, Mercedes Vázquez, anunciou a adquisición dunha vivenda no casco histórico co fin de convertela nun museo de arte contemporáneo. “Era o soño de Manolo”, explicou Vázquez no seu discurso, “e agora tócanos soñar por el, e sobre todo actuar por el”.
IMPLICACIÓN DOS DIVERSOS AXENTES
A presidenta deste colectivo cultural precisou que o artista deixou o seu legado pictórico á Asociación e recursos para poñer este proxecto en marcha. Con todo, Mercedes Vázquez apunto que “non podemos facelo sós, precisaremos da implicación da veciñanza, dos colectivos culturais e sociais da comarca e, sobre todo, das institucións”.
Polo de agora, o acordo cos propietarios da vivenda é firme, e a Asociación quere ter o proxecto definido antes de que remate o ano.•
