• Redacción – MONFORTE. Este ano, cúmprese o 25º aniversario da Coral Polifónica do Concello de Monforte, pero a pandemia obrigou a anular todo tipo de celebración, á espera de mellores condicións epidemiolóxicas. Por este motivo, dende o Consistorio anunciaron que será en 2022 cando se leven a cabo os actos para conmemorar a fundación desta entidade cultural de gran traxectoria na cidade do Cabe.
CONCERTO ESPECIAL
O anuncio do programa conmemorativo fíxoo o alcalde, José Tomé, a comezos de setembro, acompañado pola concelleira de Cultura, Marina Doutón; a actual presidenta da Coral, María del Carmen Lobo, e por Ramón Rodríguez Buján, que presidiu a entidade dende a súa fundación en 1996 ata o ano 2019. O acto estrela da celebración será un concerto especial no que a Coral monfortina compartirá escenario cunha formación musical de prestixio que se anunciará oportunamente. Así mesmo, o concerto servirá para render homenaxe aos integrantes da Coral xa desaparecidos, ou que abandonaron a entidade ao longo destes anos.
EXPOSICIÓN FOTOGRÁFICA
A lembranza dos primeiros 25 anos da Coral Polifónica do Concello de Monforte poderá verse a través dunha exposición con imaxes das actuacións máis destacadas e das viaxes que a formación realizou ao longo da súa existencia. A mostra gráfica complementarase coa proxección de varios audiovisuais.
A axenda conmemorativa do primeiro cuarto de século da Coral Polifónica do Concello de Monforte de Lemos incluirá unha conferencia sobre o canto coral en Galicia, a cargo de expertos na materia, e un Curso Coral. Así mesmos, o programa das Festas Patronais de Monforte para 2022 integrará un escrito específico sobre o XXV aniversario da Coral e a súa historia.
MATERIAL CONMEMORATIVO DESTE 25 ANIVERSARIO
O programa culminará coa edición dun lápiz de memoria no que se incluirán gravacións referidas á Coral, e que será entregado polo Concello aos membros da entidade e ás súa familias, así como un pin conmemorativo.Tamén se adquirirá unha peza de artesanía para o expositor que a Coral ten no Edificio Multiusos.•
