• Redacción- MONFORTE.
A Xunta destinar preto de 318.000 euros en axudas para diversas actuacións no polígono industrial do Reboredo en Monforte. As achegas aplicaranse á ampliación do único camiño que queda por urbanizar no parque industrial, e para habilitar un espazo de 180 metros cadrados que se destinará a viveiro de empresas.
COLABORACIÓN “NUN OBXECTIVO COMÚN”
Así o destacou na súa visita ao polígono monfortino o vicepresidente económico e conselleiro de Economía, Empresa e Innovación, Francisco Conde, a finais do mes pasado. Conde, que estivo acompañado polo alcalde, José Tomé, e varios membros da Corporación monfortina, destacou “a colaboración entre a Xunta e o Concello nun obxectivo común como é a dinamización económica e empresarial e a creación de emprego nun eido importante para Lugo e Galicia como é a Ribeira Sacra”.
O conselleiro fixo balance en Monforte das actuacións en materia de fomento do emprego e dinamización económica que a Xunta desenvolve no sur de Lugo. O futuro viveiro de empresas do Reboredo será o cuarto proxecto deste tipo que o Executivo galego impulsou este ano na provincia, xunto aos de Corgo, Bóveda e Paradela. Así mesmo, o conselleiro destacou que Monforte de Lemos foi o primeiro municipio declarado Concello Emprendedor pola Xunta, categoría coa que agora xa contan outros 37 municipios galegos, e que gozan de achegas específicas.•
