• Redacción- MONFORTE. O Concello de Monforte vén de abrir un novo espazo de atención turística, adicado aos visitantes que percorren o Camiño de Inverno. O pasado 13 de setembro, quedou inaugurada a Oficina do Peregrino nos baixos do antigo Hotel Comercio, un espazo situado na céntrica Praza Doutor Goyanes. A oficina dispón de materiais promocionais expresamente elaborados para este servizo turístico.
ATENDER VISITANTES QUE VEÑEN AO LONGO DE TODO O ANO
No evento de apertura, o alcalde de Monforte, José Tomé, manifestou que a Oficina do Peregrino “contribuirá a desestacionalizar e distribuír ao longo de todo o ano a oferta turística municipal”. O rexedor destacou que os usuarios deste servizo “transitan por esta ruta ao longo de todo o ano, e especialmente fóra dos meses de verán”. A Oficina do Peregrino será, en palabras do alcalde, “un novo espazo turístico que vai contribuír a dar a coñecer a nosa cidade a todas aquelas persoas que nos visiten, que cada vez son máis”.
A COMPOSTELA EN MONFORTE
Os peregrinos que se acheguen a este punto de información poderán recibir a Compostela selada por un prezo de dous euros, xa que dende Monforte de Lemos percórrense os quilómetros necesarios para a súa obtención.
O espazo está distribuído en dúas zonas. Á entrada, sitúase o posto de atención con mostrador, equipo informático, terminal telefónica e conexión wifi, cunha sala de espera con elementos gráficos promocionais sobre Monforte de Lemos.
Xa na zona interior, a Oficina do Peregrino acolle un Centro de Interpretación do Camiño de Inverno, con información específica sobre o traxecto, mediante elementos gráficos, documentación e proxeccións de audiovisuais. Ademais, pódese desfrutar, ademais de varios elementos interactivos, dun gran panel coas 9 etapas do Camiño de Inverno, e un gran mapa histórico de Monforte.
O Concello vén de editar un Plano e unha Guía do Peregrino, en galego, castelán e inglés, destacando tanto os puntos de interese da ruta como os de Monforte.•
Cargando ...
