• Fallou o Tribunal Superior de Xustiza de Galicia
O Alcalde de Monforte, José Tomé Roca, informa da sentenza favorable ó Concello monfortino, ditada pola Sección 3 do Contencioso Administrativo do Tribunal Superior de Xustiza de Galicia en relación co recurso interposto pola empresa Gas Monforte S.L. contra a declaración de urxente ocupación, a efectos de expropiación forzosa, dos bens e dereitos necesarios para a realización das obras do proxecto do Parque do Barrio do Hospital de Monforte de Lemos.
SATISFACCIÓN POLA RESOLUCIÓN
FAVORABLE
O Alcalde amosou a súa satisfacción “pola resolución favorable ditada polo Contencioso Administrativo Tribunal Superior de Xustiza de Galicia, a cal nos permitirá seguir adiante co proceso construtivo do futuro Parque do Hospital, que suporá unha mellora moi significativa para este barrio da cidade, xa que o dotaremos de novos espazos destinados ó lecer e esparcemento, así como dunha zona con 60 prazas de aparcamento”. O novo parque público do Barrio do Hospital vai incluír varias zonas de céspede, unha zona de xogos infantís, paseos peonís lonxitudinais e transversais, estará dotado de varios elementos biosaudables de ximnasia para maiores e finalmente contribuirá a paliar o déficit de estacionamento na zona do Hospital contando co aproximadamente 60 prazas de estacionamento para vehículos e tamén contará con estacionamentos para motos, para bicicletas e prazas para minusválidos.
A superficie da parcela que albergará este parque será de aproximadamente 6.212 metros cadrados. •
