Compleméntase así o programa ReAcciona, que desde o 2012 leva impulsado o desenvolvemento de máis de 2.000 proxectos que permitiron mellorar a competitividade de 1.333 empresas galegas, mobilizando 10,5M€
A Xunta de Galicia vén de abrir o prazo de solicitudes do programa ReAcciona covid-19, unha novidosa liña de actuación impulsada pola Vicepresidencia segunda e Consellería de Economía, Empresa e Innovación na procura de cooperar co tecido empresarial galego no actual escenario económico, contribuíndo ao seu impulso e recuperación tras a pandemia.
A situación de crise sanitaria ocasionada polo virus da covid-19 obrigou á adopción dunha serie de medidas en canto á mobilidade de persoas e ao exercicio de actividades sociais e económicas para conter o avance da epidemia, protexer ás persoas do risco de contaxio e garantir na medida do posible a continuidade da actividade económica e conseguintemente a protección do emprego. Estas medidas tiveron un forte impacto nas economía e nas empresas, especialmente as pemes, que tiveron que dedicar unha importante cantidade de recursos a superar a crise da covid-19.
MELLORA DA
COMPETITIVADE
Neste sentido, a convocatoria aspira a reforzar a posición de partida das pemes galegas de cara á mellora da súa competitividade e para abordar novos mercados. Un obxectivo enmarcado na propia filosofía do programa ReAcciona, que o Goberno galego vén desenvolvendo desde 2012, reforzando deste xeito a súa aposta pola economía circular.
PRAZO ABERTO
DE SOLICITUDES
Así, esta nova liña, cuxo período de solicitudes permanecerá aberto ata o vindeiro 15 de novembro, diríxese á consecución de resultados, á aprendizaxe e á autonomía das empresas, que serán acompañadas durante todo este proceso. De feito, cada servizo consta sempre de tres partes: formación e sensibilización, análise e execución do plan de traballo.
CINCO SERVIZOS
Así, o ReAcciona covid-19 suma cinco novos servizos que atenden á situación económica xurdida da pandemia. As pemes galegas poderán acceder a prestacións especializadas no relativo á adecuación dos estados financeiros, á transmisión ou adquisición de unidades produtivas, á análise de mercados internacionais, á elaboración de plans estratéxicos de internacionalización e á implantación de procesos acordes á economía circular.
BENEFICIARIOS
Poderán solicitar estes servizos as pequenas e medianas empresas, incluíndo as agrupacións de persoas físicas ou xurídicas, públicas ou privadas, as comunidades de bens e calquera outro tipo de unidade económica. Como mínimo, deben contar con tres traballadores. Así mesmo, os beneficiarios deben desenvolver a súa actividade en Galicia, tendo, como mínimo, un centro de traballo na Comunidade e a súa facturación en 2020 debe ser un 10% inferior á do ano precedente. Todos os servizos teñen un custo de 600 euros para o solicitante, sendo o seu valor de mercado de 10.000 euros. Deste xeito, o Goberno galego complementa o programa ReAcciona, unha iniciativa que ten facilitado ata a data o desenvolvemento de máis de 2.000 proxectos que permitiron mellorar a competitividade de 1.333 empresas galegas, mobilizando 10,5 millóns de euros.•
AS AXUDAS DO PLAN REACCIONA COVID-19 ABARCAN ATA CINCO SERVIZOS DIFERENTES
Os servizos para os que se poderá conceder axuda dentro do programa ReAcciona covid-19 son os seguintes:
a) Reestruturación financeira e adecuación de estados financeiros tras o impacto da covid-19 e os novos modelos de negocio.
b) Preparación para a transmisión ou adquisición de unidades produtivas.
c) Elaboración, adaptación e implementación de plans estratéxicos de internacionalización da empresa ou sector ao novo escenario internacional.
d) Análise de mercados internacionais concretos en relación á nova situación motivada pola emerxencia sanitaria da covid-19 e as necesidades específicas do solicitante de cara á apertura ou permanencia en dito mercado.
e) Consultaría relacionada coa implementación de metodoloxías de traballo e procesos acordes aos principios da economía circular.
