As eleccións primarias para liderar o PSdeG, chegan ao Sur de Lugo: Gonzalo Caballero e Valentín González Formoso buscan apoios en Monforte e Chantada

Incertas e rifadas preséntanse as eleccións primarias para liderar ao PSdeG, nas que o actual secretario xeral Gonzalo Caballero, enfróntase a un candidato alternativo forte e con apoios, como é o alcalde de As Pontes e presidente da Deputación da Coruña, Valentín González Formoso. Ambos candidatos presentaron o número máximo de avais permitidos na convocatoria, 408, o que reflicte o forte apoio que teñen da militancia. Preséntanse estas eleccións nun momento cun PSOE que goberna en Madrid, reforzado tras o seu recente Congreso Federal, no que se escenificou a vixencia do seu proxecto socialdemócrata, e se asinou unha paz entre as diferentes sensibilidades socialistas, personalizada no abrazo entre Felipe González e Pedro Sánchez, e un PSdeG, que a pesar de ostentar un importante poder no ámbito local, viuse superado recentemente polo BNG, na súa pugna por converterse nunha alternativa a Feijoo.
Gonzalo Caballero, nun acto coa militancia monfortina sinalou “cada día atopo máis ilusión entre os compañeiros e as compañeiras. Cada día somos máis os e as que queremos seguir avanzando pola esquerda e non retroceder. Hai unha mobilización crecente da militancia socialista para apostar polo único proxecto gañador contra a dereita; cada día máis militantes se están activando e cargando as pilas”. Pola súa banda González Formoso en Chantada chamou “á participación da militancia nas Primarias do 30 de outubro para facer un PSdeG máis forte que poida ser a alternativa en Galicia”. Formoso avogou por “recuperar a ilusión” e incidiu en que “é posible construír un proxecto alternativo á dereita en Galicia, porque Galicia non ten cor política, é de quen a entenda e de quen a atenda”. Anunciou “unha campaña de ideas e propostas, en positivo, e sen confrontacións persoais xa que todos somos militantes, todos somos socialistas”. •