•O obxectivo é promover a solidariedade con iniciativas que dean pulo ao desenvolvemento da bisbarra
O que fai xa sete anos, en 2014, xurdiu como unha iniciativa para que se investise na comunidade parte da choiva de millóns que deixou o premio da lotería de Reyes, consolidouse, grazas ao traballo dos seus promotores, e á colaboración con institucións como o IGAPE, as tres universidades galegas e diversos patrocinadores privados, para chegar á sétima edición do Concurso de Proxectos Empresariais Semente, que agora acaba de resolverse e no que o xurado decidiu outorgar os seguintes premios:
• 1º: Insectos Galicia. Un proceso de economía circular para poñer en valor o rural con proteínas e abonos sostibles e ecolóxicos. 12.000€.
• 2º: Circular Forest. Produción de cogomelos en biomasa forestal. Lepista nuda en follaxe de castiñeiros, Shiitake en tocóns de eucalipto, Sparassis en pinos. Transfromación de cogomelos de alto valor comercial. 8.000€.
• 3º: Castro Art Village. Uhna institución cultural, un campus artístico internacional de organización holística. Proxecto de arte, cultura, benestar e innovación situado na aldea abandonada do Castro, unha ubicación idílica nun miradoiro natural. 5.000€.
A Asociación Semente Monforte destacou a altísima calidade dos proxectos presentados e o talento como emprendedores. e agradeceu a colaboración das empresas: Universal, R cable e telecomunicacións, Dimaga, Sicyme, ct.galega, Autocares Sánchez, Daveiga, Estrella Galicia, Gadis, Inveravante e Rectoral de Amandi.•
O vicepresidente económico e conselleiro de Economía, Empresa e Innovación, Francisco Conde, destaca o compromiso coa sustentabilidade das iniciativas presentadas aos premios Semente
O vicepresidente económico e conselleiro de Economía, Empresa e Innovación, Francisco Conde, asistiu en Monforte de Lemos á VII edición dos Premios Semente da Ribeira Sacra, onde quixo agradecer ás iniciativas empresariais presentadas o seu compromiso coa sustentabilidade e a súa ilusión por emprender.
Conde indicou que, como xa ocorreu nas seis edicións anteriores, tanto nos proxectos finalistas como nos tres gañadores, a innovación volveu ser a protagonista á hora de pensar no desenvolvemento do medio rural e poñer en valor os seus recursos a través de propostas de economía circular; tecnoloxía aplicada ao sector primario —forestal ou vitivinícola, en particular—; ou vencelladas á cultura e o turismo sostible.
Facendo referencia á recente declaración da Ribeira Sacra como a sétima reserva da biosfera de Galicia, Conde salientou o afán das iniciativas presentadas por enxalzar e protexer este espazo natural e os seus sectores tradicionais, deixando de manifesto a súa aposta pola sustentabilidade e o seu compromiso co medio ambiente.
Conde quixo agradecer á asociación Semente de Monforte o seu labor de mecenado para que poidan ver a luz iniciativas que apostan pola economía sostible na zona. Así, resaltou o potencial dunha provincia como a de Lugo, onde se constituíron 290 proxectos empresariais nos nove primeiros meses do ano –un 20% máis que no mesmo período de 2020–, polo que asegurou que estes premios veñen a constatar que “Galicia, Lugo e A Ribeira Sacra teñen canteira e dispoñen do mellor talento” para seguir facendo futuro. •
Cargando ...
