José Miñones anunciou en Monforte que o Goberno central compromete 558 millóns para consolidar a cidade como nó de comunicacións e motor económico da provincia

• Na visita do delegado do Goberno a Monforte, o alcalde salientou o compromiso do Executivo español coa cidade e a provincia

Imaxe da rolda de prensa ofrecida no Concello de Monforte polo delegado do Goberno en Galicia, José Miñones. GPCM.

• Redacción- MONFORTE. O delegado do Goberno en Galicia, José Miñones, acompañado pola Subdelegada do Goberno en Lugo, Isabel Rodríguez, foi recibido en visita oficial en Monforte polo alcalde, José Tomé Roca, e a primeira tenente de Alcalde, Gloria Prada, xunto co concelleiro de Obras, José Luís Losada. Unha vez rematadas as formalidades, coa sinatura no Libro de Honra, levouse a cabo unha reunión de traballo na que supervisaron os proxectos e investimentos do Estado en Monforte. Na rolda de prensa posterior, o alcalde amosou a súa satisfacción porque “o actual Goberno de España volveu a poñer a Monforte no mapa das infraestruturas, que vertebra a cidade e a provincia de Lugo”. O delegado do Goberno en Galicia, José Miñones, repasou os compromisos do Executivo con Monforte, con actuacións que superan os 558 millóns de euros, para consolidar o papel deste concello como “nó de comunicacións e motor da economía da provincia de Lugo e de Galicia”. O delegado apuntou que “o Goberno responde á relevancia de Monforte cuns investimentos que están á altura do concello”, e destacou que Monforte “é agora protagonista do maior investimento do Goberno en Galicia tras finalizar a construción da Alta Velocidade” con 546 millóns de euros para a modernización do corredor ferroviario entre Ourense e Lugo. Adif executará nos próximos tres anos 71 contratos para poñer ao día a liña e conectala coa alta velocidade que pasará por Ourense. “Nestes momentos xa se atopan en execución a renovación da vía entre Monforte de Lemos e Lugo e o túnel de Oural, que suman máis de 80 millóns de euros”.
Dentro deste proxecto, José Miñones lembrou que esta semana Adif adxudicou a adecuación da estación de tren de Monforte ás novas condicións do corredor. O delegado do Goberno en Galicia engadiu que son “3 millóns de euros para a renovación completa deste equipamento” aos que haberá que sumar os 6 millóns previstos para a supresión dos primeiros pasos a nivel do municipio, que configurarán un novo espazo urbano nesta área de Monforte.

RESTAURACIÓN DE
PINTURAS E RETABLOS
Con posterioridade, desprazáronse ata a o Mosteiro de San Vicente para supervisar os traballos de restauración executados polo Ministerio de Cultura na igrexa deste conxunto monumental, cunha inversión a través do Instituto do Patrimonio Cultural de España de 534.148 euros.

SOSTIBILIDADE
AMBIENTAL
Miñones apuntou que a mellora ambiental e da calidade de vida da poboación de Monforte recibe preto de 5 millóns de euros do Goberno de España, 2,8 millóns de euros en axudas do Ministerio para a Transición Ecolóxica cos que o Concello substituirá máis de 5.000 puntos de luz por puntos LED, e 1,9 millóns para a segunda fase da renovación do saneamento e depuración das augas.

SERVIZOS PÚBLICOS
O delegado do Goberno insistiu na necesidade de dotar ás vilas de servizos públicos de calidade, e destacou a renovación da oficina da Seguridade Social, “unha actuación moi necesaria dado o estado actual do inmoble e que beneficiará as 55.000 persoas que atende esta sede”. A obra está en proceso de contratación cun orzamento de 545.000 euros.

NOVA COMISARÍA
Os responsables estatais e locais analizaron a dotación dunha nova comisaría de Policía. O delegado apuntou que trala cesión dun edificio polo Concello «xa estamos a redactar o proxecto de adaptación do edificio ás necesidades policiais”.•

Deixa unha resposta

Your email address will not be published.

Enquisas

ESTÁ CONFORME CO PROXECTO PARA CONSTRUÍR UNHA NOVA PONTE DE FERRO NO MALECÓN EN SUBSTITUCIÓN DA PASARELA PEONIL ACTUAL?

Cargando ... Cargando ...

Resumen mensual de noticias

Nova Anterior

●●● A vida na aldea de Bexán (O Saviñao) só está nas fotografías

Seguinte Nova

O AVE chega a Galicia con doce anos de atraso sobre o prazo inicialmente previsto

Últimas noticias sobre ECONOMÍA

Ir aInicio

Don't Miss