Moita expectación durante a previa do encontro que enfrontaba a dous dos equipos máis en forma da categoría, SD Sarriana e Club Lemos, que ademais da tradicional rivalidade esta tempada están empolicados nos postos nobres da clasificación pelexando polo ascenso de categoría. E esa expectación reflectiuse na magnífica entrada na Ribela, con maioría de afeccionados locais na bancada, que así respondían á chamada dos seus xogadores e directivos durante toda a semana, pero na que tamén se deixaron notar numerosos monfortinos. O partido non foi todo o bo que cabía esperar, a presión e as baixas importantes é ambos os equipos deixáronse notar. Non houbo un dominador claro e as ocasións de gol escasearon. E nese contexto a calidade sempre marca as diferenzas. E esta chegou da man de Diego Torres nun remate de cabeza totalmente libre de marca cando aínda non se cumpriu o cuarto de hora de partido. Non foi capaz o Lemos, a pesar de que dominou durante o segundo tempo de darlle a volta ao partido. Os sarriáns pechan o ano como líderes da categoría mentres o Lemos baixa á cuarta praza, empatado a puntos co Betanzos pero cun partido menos.•
Cargando ...
