Un paso máis se produciu no conflito que manteñen aberto desde hai meses sete vocais do CRDO Ribeira Sacra co seu presidente, tras a resolución da Valedora do Pobo relativo ao escrito de queixa ante a inacción da Consellería do Medio Rural por o incumprimento de funcións por parte do presidente do Consello Regulador RIBEIRA SACRA ao non convocar un pleno de moción de censura legalmente solicitado. Segundo a devandita resolución, a Consellería de Medio Rural confirma os feitos sinalados, polo que considera a Valedora que a Consellería tiña que aplicar ante este incumprimento o artigo 21 da Lei 2/2005, do 18 de
febreiro, de promoción e defensa da calidade alimentaria galega. Indica o citado articulo que as sancións para incumprimentos graves leva aparexado a suspensión das súas funcións o presidente de D.O. Ribeira Sacra por un período de entre tres e seis meses ou a súa suspensión definitiva.
Recórdalle a Valedora do Pobo á consellería de Medio Rural que no prazo dun mes lle comunique as medidas adoptadas para darlle efectividade as súas conclusións, tendo en conta “Que con urxencia se avalíe a aplicación das consecuencias xurídicas previstas na Lei 2/2005, do 18 de febreiro, de promoción e defensa da calidade alimentaria galega, para os incumprimentos dun órgano de goberno do CR, neste caso o presidente, de obrigas que lle incumbían, despois de que o apercibimento da consellería non fora atendido”.
Queda por ver agora cal será o seguinte capítulo dun conflito que leva demasiado tempo aberto, e para o que urxe unha rápida solución, aínda que non parece que esta poida chegar a curto prazo. Non hai máis que ver outra fronte aberta recentemente co censo de adegueiros e viticultores e a súa representatividade, ante as futuras eleccións do próximo ano.•
Cargando ...
