• A comarca de Chantada ten unha incidencia superior a 500 casos por 100.000 habitantes
O delegado territorial da Xunta en Lugo, Javier Arias, acompañado polo xerente da área sanitaria, Ramón Ares, asistiu ao cribado organizado pola Consellería de Sanidade en Chantada o pasado venres co fin de detectar posibles casos asintomáticos da covid-19 e previr contaxios.
Arias apuntou que neste momento a Zona Sur ten a incidencia máis alta da provincia, con máis de 500 casos por 100.000 habitantes; mentres que na zona centro é de 220 e na comarca da Mariña ronda os 100.
Tamén salientou a boa resposta da cidadanía, que acudiu ao recinto gandeiro de Chantada desde primeira hora da mañá para realizar a PCR. O Sergas convocou a toda a veciñanza a acudir voluntariamente e seguirá tomando mostras pola tarde. Tamén se desprazaron ata o lugar onde se están a realizar as probas os alcaldes de Chantada, O Saviñao, Carballedo e Taboada.•
