A datación con carbono 14 revela Penas de Castelo como un dos castros documentados máis antigos de Galicia

• Redacción- MONFORTE. A primeira campaña arqueolóxica en Penas do Castelo segue dando resultados únicos e sorprendentes. Este xacemento situado na ladeira do Río Lor na parroquia de Salcedo, A Pobra do Brollón, foi escavado o pasado verán. Durante a escavación, a edafóloga Cruz Ferro tomou unhas mostras de terra «en puntos clave do momento de construción da muralla» comenta. Tras ser analizadas por Carbono-14 no laboratorio BETA de Miami, os resultados das datacións dan século VIII–IX antes da nosa era. Trátase dun castro extremadamente temperán, polo que non resulta comparable cos castros máis «clásicos» de épocas posteriores. «‘Isto refléxase na propia toponimia; non é casual que se lle chame castelo e non castro» sinalan dende o equipo. Con esta datación, Penas do Castelo sitúase precisamente no que sería a transición da Idade do Bronce á Idade do Ferro, un período histórico no noroeste peninsular moi descoñecido a nivel de investigación, o que fai que, máis alá do local,o xacemento gañe interés científico.•