Máis da metade do Orzamento de 2022 en Sober irá a gasto social e benestar comunitario

O Concello de Sober disporá de máis de 2,7 millóns de euros de orzamento para 2022. GPCS

• Redacción- MONFORTE. A finais de decembro, o Concello de Sober deu luz verde ao Orzamento para 2022, que ascende a 2.783.910 euros. A Corporación municipal aprobou o 24 de decembro as contas para o ano que comeza, co voto a favor do Partido Popular e do Partido Socialista, e a abstención de Agroma Sober.

PRESUPOSTOS CON PERSPECTIVA DE XÉNERO
Segundo informaron dende o Concello, na elaboración deste Orzamento tívose en conta a previsión de transversalidade de xénero en cada unha das súas partidas, co obxectivo de transmitir unha imaxe efectiva igualitaria, plural e non estereotipada de homes e mulleres na sociedade.
Ademais, dende o Goberno local de Sober salientaron que 1.500.000 euros deste orzamento irá destinado ao gasto social e benestar comunitario, o que supón máis do 50% do orzamento total.

NON HAI SUBIDA DE IMPOSTOS E BAIXA A TAXA DE LIXO UN 10%
As contas de 2022 destinan máis de 300.000 euros a Cultura, Educación e Deporte. Por outra banda, o Concello non subirá nen taxas nen impostos este ano. Nesta liña de rebaixa fiscal, contémplase a redución da taxa do lixo nun 10%, así como a gratuidade da gardería municipal.

MÁIS ATENCIÓN A ASOCIACIÓNS DEPORTIVAS E CULTURAIS
Entre os aspectos destacados destas contas, está o incremento nun 40% nas axudas aos clubs de fútbol, tendo en conta a necesidade de adquirir test de antíxenos. Por último, o Goberno soberino prevé que este ano haberá bases para axudas a festas parroquiais e asociacións culturais.

MÁIS DE MEDIO MILLÓN DE EUROS EN INVESTIMENTOS REAIS
No apartado de investimentos, a previsión inicial para o 2022 inclúe 560.000 euros. Desta cantidade, máis de 150.000 financiarán a mellora de camiños municipais, e outra partida similar servirá para reurbanizar puntos en San Martiño de Arroxo, Lobios e Sober. Así mesmo, haberá partidas para intervencións nos dous campos de fútbol do Concello, para resembrado e para instalar novos bancos de uso dos xogadores. Outras partidas adicaranse a melloras nas redes de saneamento e abastecemento.

CONVENIOS COAS CONSELLERÍAS PARA OBRAS
A maiores, os Orzamentos de 2022 incorporan partidas para convenios coa Xunta, como os 100.000 euros do convenio coa Consellería de Medio Ambiente para saneamentos, e os 50.000 do convenio con Medio Rural.

SEGUEN AS AXUDAS AOS ESTUDANTES EMPADROADOS NO MUNICIPIO
Terán continuidade as axudas para libros e material escolar para Infantil e Primaria, así como as axudas aos universitarios e, neste ano, aos de Bacharelato e Ciclos Superiores.

FOMENTO DO EMPREGO
Para políticas de emprego, o Concello de Sober inclúe unha partida que supera os 80.000 euros. Así mesmo, contémplase unha subida salarial para todo o persoal municipal de ata o 2%, o máximo estipulado nos Presupostos Xerais do Estado para este ano.•

Deixa unha resposta

Your email address will not be published.

Nova Anterior

José Luís Álvarez, Alcalde de Pantón, ten como obxectivo levar auga potable a todo o municipio antes de completar o mandato

Seguinte Nova

ESPECIAL FITUR 2022

Últimas noticias sobre ECONOMÍA

A %d blogueros les gusta esto: