• Está organizado pola empresa galega CleverCap Sistemas co patrocinio da Xunta de Galicia, e contará tamen co copiloto lucense Diego Vallejo e cunha auténtica lenda do Dakar como Joan Pedrero
O secretario xeral para o Deporte, José Ramón Lete Lasa, mantivo unha xuntanza de traballo cos deportistas galegos que veñen de competir no Rally Dakar 2022. Por unha banda, o copiloto lucense Diego Vallejo rematou o rally -xunto ao piloto Óscar Fuertes- na trixésimo cuarta (34) posición da categoría de coches na que supuxo a súa sexta participación no rally. Pola outra, o piloto lucense Eduardo Iglesias concluíu a proba na septuaxésimo oitava (78) posición na categoría de motos, firmando o seu terceiro Dakar consecutivo. Para Lete Lasa, que “os dous deportistas galegos que encaraban o rally máis esixente do mundo chegaran á meta demostra a gran calidade e o gran momento que atravesa o motor en Galicia”.
APOSTA POLA PRESENZA GALEGA NO DAKAR
Lete Lasa asegurou que a Xunta seguirá apoiando a presenza de deportistas galegos nas probas máis importantes do mundo como é o caso do Dakar e como ocorre con Eduardo Iglesias grazas ao patrocinio recibido da Secretaría Xeral para o Deporte e de Galicia Calidade.
NAVEGACIÓN CO EQUIPO CAP ROAD
Neste sentido, o mandatario galego informou que a Xunta de Galicia patrocinará o curso de navegación off road con roadbook organizado pola empresa galega CleverCap Sistemas de Información e que será impartido por Diego Vallejo, Eduardo Iglesias e toda unha lenda do Dakar como Joan Pedrero, 13 participaciones en el Dakar, dous quintos postos en 2011 e 2013 e dúas etapas gañadas no 2014 e 2017. O curso terá lugar os días 18 e 19 de marzo en Santiago de Compostela, e dará a coñecer a nova navegación aplicada no Dakar, ademais de perfeccionamento e xestión en técnicas de navegación. Ademais, o domingo 20 de marzo terá lugar unha mesa redonda na que participarán pilotos de primeiro nivel mundial e na que compartirán as súas experiencias cos participantes do curso e o público asistente.
O sistema de navegación utilizado no Dakar é produto da empresa francesa ERTF pero o seu uso está restrinxido ao propio rally. O único xeito de adestrar con este modelo é a través do equipo Cap Road, creado pola empresa galega CleverCap, e que replica as funcionalidades do sistema orixinal francés. Este equipo Cap Road será a principal ferramenta de navegación durante o curso, desenvolvido para o seu uso en eventos deportivos off road, e de forma explicita na modalidade rally raid. Nun só equipo móstranse todos os elementos e parámetros necesarios para a navegación off road: roadbook electrónico, odómetros parcial e total recalables, distancia a waypoint obxectivo, rumbo actual, rumbo a seguir, tanto en graos como con punteiro, velocidades, alertas visuais e acústicas, información GPS, etc.
Un dos colaboradores neste curso, Singletrack, ofrece un agasallo a todos os rexistrados, a APP ADVENTURE GALICIA especifica de navegación off road.•
Cargando ...
