• O congreso do PSdeG de Lugo, pon fin a un tempo de cambios e incertezas despois das primarias galegas que auparon a Valentín González Formoso
Foto GCPSdeG.
José Tomé Roca foi proclamado Secretario Xeral do PSdeG na provincia de Lugo no IV Congreso Provincial socialista que se celebrou no hotel Torre de Núñez baixo o lema Lugo Avanza. Tomé Roca asegurou que deste congreso “os socialistas saímos unidos e máis fortes para darlle un novo impulso ó Partido Socialista na provincia, para seguir medrando, para seguir ampliando a representación institucional e para seguir mellorando a nosa provincia e a vida dos nosos veciños e veciñas. A provincia necesita máis Partido Socialista”.
Dende o que Tomé considera un “bo punto de partida”, pois o PSdeG goberna a día de hoxe para o 65% da poboación lucense, con 27 gobernos, catro cogobernos, e a Deputación de Lugo, o Secretario Provincial situou como obxectivos “consolidar as alcaldías que temos, conseguir outras novas nas que temos clarísimas opcións, manter a Deputación e, con toda esa forza municipalista, axudar a renovar o Goberno de España e a recuperar o Goberno da Xunta de Galicia, que tanta falta lle fai a este país”.
Para continuar avanzando, Tomé Roca establecerá no plano orgánico unha serie de medidas, que lle foi trasladando a militancia nos encontros Camiñamos Xuntos que mantivo nas últimas semanas por toda a provincia. “Iso é moi bo, porque así é máis fácil remar todos e todas na mesma dirección”, afirmou o Secretario Xeral, explicando que, “para empezar, concordamos na unidade, en que queremos un partido unido porque iso é forza. E, neste sentido, creo que empezamos ben porque, gracias ao diálogo e ao acordo, houbo unha única candidatura á dirección do partido na provincia, e o compañeiro Xosé María Arias integrouse nesta candidatura que hoxe sae ratificada neste Congreso”.
José Tomé agradeceu a Arias que puxese “por riba de todo, a vontade de acordo e de integración, máis alá das lexítimas aspiracións persoais a optar a un cargo que calquera compañeiro ou compañeira pode ter”.
O novo Secretario Xeral fixou catro liñas de traballo: máis bases, máis cercanía e participación, máis apoio as agrupacións e máis coordinación nas mensaxes. Por outra banda as súas liñas de acción política xirarán arredor da defensa do rural, a defensa do estado do benestar, o traballo pola mocidade e a igualdade, o impulso dos sectores produtivos estratéxicos, a elaboración dun Plan Industrial, a aposta pola mobilidade, a innovación e a transformación dixital.
José Tomé expresou o seu “orgullo enorme por asumir este reto d representa a Secretaría Xeral do PSdeG en Lugo.•
