Estamos en pleno apoxeo do Mes do Amandi, un conxunto de eventos que serven para levar máis aló a tradicional Feira do Viño de Amandi, que se celebrará os días 9 e 10 de abril.
Iso conleva un conxunto de actos de todo tipo promovidos polo Concello de Sober, que van desde conferencias, exposicións, presentacións e concertos. Pero aínda no medio deste vórtice festivo e vinícola, non quixo o concello de Sober deixar de lado a crúa realidade que neste momento está a vivirse en Ucraína, e decidiu colaborar coa organización dun concerto solidario coas vítimas da guerra e incluílo como un máis dos eventos do Mes do Amandi. E o resultado non puido ser máis satisfactorio. O traballo de Selene, Tamara Arias e Leticia Sáez foi todo un éxito no organizativo. A música correu a cargo de Os Parentes e DJ Nacho Morais e Elías Vieira. O público asistiu de forma numerosa á Praza do Toural, e o mellor de todo é que a cantidade recadada ascendeu a de 3.332,42 euros, que irán destinados de xeito íntegro ás persoas de Ucraína a través da conta que habilitou a Asociación AGA-Ucraína. A organización do Concerto solidario coas vítimas de Ucraína, en colaboración co Concello de Sober, queren dar as GRAZAS de todo corazón á xente que se achegou o pasado sábado á Praza do Toural e a toda aquela que fixo as súas achegas polas vías previamente habilitadas. •
