Mentres o Concello vén de amosar a súa satisfacción por conseguir a cesión de máis de 111.000 m2 de terreos para ampliar o Polígono do Reboredo, o PP de Monforte faise eco dunha carencia presente que non por máis cotiá carece de importancia, a falta de iluminación da entrada ao polígono industrial dende a N-120, así como a que consideran deficiente sinalización horizontal das rúas da cidade. Neste senso, os populares, segundo explica Katy Varela, demandaron no Pleno que o Concello corrixa ambas as dúas situacións, pois, no primeiro caso, trátase dun dos accesos principais á vila que rexistra moita circulación tanto de particulares, como dos vehículos pesados que acceden ás distintas empresas que están asentadas na área industrial.
No segundo caso, indica a líder do PP monfortino, “os paseos de peóns están practicamente borrados. Incluso hai sinais de tráfico que case non se ven”, destaca. Por este motivo, insta á entidade local a subsanar esta deficiencia canto antes. “Cremos que é necesario para garantir a seguridade vial que a sinalización horizontal da cidade estea continuamente controlada e ben pintada para evitar situacións de risco”, engade.
Para Katy Varela “son dúas necesidades que temos. O Concello ten que solucionar estas demandas e non pode eludir a súa responsabilidade”. •
