Xusto na semana en que se celebra o Día Mundial do Teatro, o concello de Monforte, a través da súa Concellería de Cultura dá a coñecer o programa do que será a XXIX edición do Certame Municipal de Teatro para centros de ensino de Monforte.
«O Día Mundial do Teatro sinala o momento da impresionante unión entre o singular e o plural, o obxectivo e o subxectivo, o consciente e o inconsciente e mostrará ao mundo as extraordinarias criaturas que esa unión produciu. A maioría dos desacordos que existen no mundo débense ao extrañamiento das mentes pola barreira da linguaxe: o enorme e complexo mecanismo do teatro estableceuse precisamente para superar dunha vez eses desacordos e esa barreira». Este é un fragmento da mensaxe que Jean Cocteau redactou en 1962 para celebrar o primeiro Día Mundial do Teatro. Un espírito que hoxe está máis vixente que nunca, tal como reflicte a ampla programación teatral na nosa comarca. Se esta mesma semana viña de representarse en Monforte a obra Cigarreiras, da compañía Contraproducións, baixo a dirección de Cándido Pazó e interpretada por Tamara Canosa, Susana Dans, Covadonga Berdiñas, Isabel Naveira, Ledicia Sola, Ana Santos e Mercedes Castro, agora no Certame representaranse 7 obras de teatro, do 26 de abril ó 12 de maio de 2022. Todas as pezas escenificaranse ás 8 da tarde no salón de actos da Casa da Cultura Poeta Lois Pereiro. Os centros participantes son os seguintes:

• CEE Infanta Elena, coa obra “Los sueños de Cloti”, o mércores 27 abril de 2022.
• Colexio Ferroviario, coa obra “A estatua”, que se representará o martes 29 abril de 2022.
• CEIP A Gándara, coa obra “O testamento do tío Nacho”, o venres 6 de maio de 2022.
• CEIP de Monforte, coa obra “Vida e cores”, o luns 9 maio de 2022.
• IES Río Cabe, coa obra “O soño do Novelo nunha noite de verán”, o martes 10 maio de 2022.
• IES A Pinguela, coa obra “A rateira”, o mércores 11 maio de 2022.
• Prodeme (asociación convidada), coa obra “Néboa no bigote”, o xoves 12 de maio.
  Os premios consistirán na gravación en DVD das obras representadas que serán entregadas ós centros participantes, así como dun diploma acreditativo.
  A entrega de premios será no Salón de Actos da Casa da Cultura Poeta Lois Pereiro o 18 de maio ás 18:00 h.•