• O BNG acada o compromiso da Axencia galega de Infraestruturas para que inicien as obras, tras o derrube de parte da estrada que une Quiroga e Folgoso do Courel, no mes de maio
Esta vía de acceso ao Courel desde Quiroga permanece cortada ao tráfico como consecuencia do desprendemento rexistrado á altura do quilómetro 18 da estrada LU-651, entre Santa Eufemia e Folgoso, o pasado 20 de marzo. A Xunta vén de realizar unha campaña de sondeos xeotécnicos na zona do afundimento da estrada, na súa chegada a Folgoso de Courel, para definir as obras necesarias para restituír a vía. O obxectivo destes traballos é coñecer en profundidade o estado e o comportamento do terreo co fin de poder avaliar a viabilidade das distintas alternativas para o restablecemento da conexión viaria.No marco destas intervencións, tamén se realizou estes días un levantamento topográfico coa axuda e a utilización de drons. Unha vez obtida esta información, a Xunta agarda que nas vindeiras semanas se poida determinar a alternativa elixida e un calendario de realización das obras.
OBRAS EN MAIO
A parlamentaria do BNG, Carme Aira acadou o compromiso do Director Xeral da Axencia galega de Infraestruturas, Francisco Menéndez Iglesias, sobre a data e orzamento das obras de reparación tras o derrubamento de parte da estrada que une Quiroga e Folgoso do Courel.
Tras as preguntas da nacionalista, Menéndez Iglesias confirmou que darán comezo no mes de maio e rematarán no verán cun orzamento do 770.000 euros. Unha vez máis, recalcou Carme Aira, “o rural e a montaña lucense vese abandonados” ante un o perigo para as persoas e o propio territorio. Só o azar, recalcou a deputada do BNG evitou “un drama humano na principal estrada do Caurel pola que pasan criaturas para escola e traballadores da propia canteira”. •
Cargando ...
