• Paseniñamente vanse recuperando as actividades festivas que se desenvolvían con normalidade antes da pandemia
Pouco a pouco, o Sur de Lugo vai recuperando as súas actividades festivas, logo de dous anos interrumpidas pola pandemia. E unha das máis tradicionais é a celebración do San Antonio, tanto nos barrios do Campo, Ramberde e Abeledos en Monforte, como na parroquia de San Fiz do Asma en Chantada, que veñen de celebrarse con moito éxito e afluencia de xente, porque vese que hai moitas ganas de troula. E non faltaron as tradicionais ofrendas e procesións, os gaiteiros, e as bombas de palenque. Coinciden ambas festas no protagonismo dos cruceiros. Nas festas de San Fiz do Asma, o 13 de xuño, foi un día moi significativo para a parroquia, onde o santo saiu a ombros dos seus veciños ata o cruceiro que precede o templo. Trala misa, no Campo de Portas, tivo lugar a poxa dalgunhas partes do porco, principalmente os miúdos (linguas, unllas etc.) e algún lacón para recadar cartos para a festa. No San Antonio monfortino tamén houbo procesión e subasta, neste caso das roscas de anís, previamente bendecidas na praza de Santa Clara. En Monforte as festas duraron catro días, ao ser festivo local o día 13 e viuse moita animación nas verbenas. •
Cargando ...
