O BNG saca adiante unha moción na que reclama unha mellora nas condicións laborais dos traballadores do Servizo de Axuda no Fogar

O BNG vén de sacar adiante por unanimidade a moción que presentou no pleno municipaldo Concello de Monforque na que se reclamaba unha mellora nas condicións laborais das traballadoras e traballadores do Servizo de Axuda no Fogar. “Os servizos públicos garanten que a veciñanza poida contar con ferramentas que fagan a vida máis doada”, explicou o portavoz do BNG, Emilio Sánchez, que engadiu “o SAF permite garantir o dereito a unha vellez digna, e o persoal que presta este servizo cumpre un papel esencial, proporcionando atención e realizando as tarefas necesarias para que moitas persoas poidan garantir a súa calidade de vida”.
A moción aprobada a inciativa do BNG insta á Xunta de Galiza a asumir a súa competencia neste servizo, mediante a creación dun sistema público e galego de coidados, que garanta o dereito dunha vellez digna a toda a poboación, e pide ao goberno galego o cumprimento do convenio colectivo do sector da atención a domicilio, co incremento salarial do 6,5%. “As traballadoras do SAF levan loitando moitos anos pola súa profesionalización e contra os abusos das empresas concesionarias”, declarou Emilio Sánchez, portavoz do BNG no concello de Monforte.•