Dous anos eran moitos sen a fogueira e as queimadas do San Xoán de Sarria, así que había moitas ganas de pasalo ben, nalgún caso demasiadas ganas, que provocaron incidentes durante a actuación de orquestra Panorama no campo de rugby do Chanto. En todo caso, non puideron embazar estas festas que estreaban localización, e nas que o Concello investiu ao redor de 150.000 €, para encher de propostas variadas as rúas da vila.
Ademais este ano, o pregón correu a cargo de Óscar Puente, alcalde de Valladolid, cuxo pai ten raíces en Sarria. Houbo de todo, a clásica noite de lume, o desfile das pampónigas, pancetada, queimada e moita música, que tivo nas verbenas con orquestras como o Combo Dominicano, Os Satélites e a xa mencionada Panorama os seus pratos fortes, con miles de asistentes. Pero tamén houbo espacio para os grupos de pop rock locais como Sound Sisters e O Taller de López.•
