A Xunta aproba a implantación dun polo creativo e varias pistas multideporte na comarca de Sarria

A Xunta de Galicia aprobou a implantación de 12 polos creativos e a execución de 12 pistas multideporte que estrearán o vindeiro curso escolar colexios e institutos da provincia de Lugo.
No caso das pistas multideporte, a provincia de Lugo é a máis beneficiada con achegas de 778.700 euros a 12 concellos (en toda Galicia son 33) para a dotación e mellora destas instalacións en centros educativos. Así, ao abeiro desta convocatoria de axudas contarán con este tipo de instalacións, entre outros, o CEIP Rosalía de Castro de Bóveda; o CEIP do Corgo; o CEIP Ricardo Gasset do Incio; o CEIP do Páramo e o CEIP de Palas de Rei.
É a primeira acción deste tipo que se pon en marcha en Galicia e a Xunta financia ata o 85% do custo destas infraestruturas nos centros escolares que son de uso conxunto entre a comunidade educativa e a cidadanía.
As axudas van destinadas a pistas multideporte en centros de Educación Infantil e Primaria e nos centros integrados non universitarios (CPI) de titularidade municipal, cuxo deseño debe ser conforme aos modelos establecidos no Plan de Nova Arquitectura Pedagóxica. O obxectivo é promover unha vida sa entre o alumnado e permitir a práctica dun mínimo de 5 deportes nun espazo polifuncional.
No caso dos polos creativos, o obxectivo principal é consolidar a Galicia como referente a nivel estatal na incorporación de tecnoloxías STEM (Ciencia, Tecnoloxía, Enxeñería e Matemáticas) ao proceso de ensino-aprendizaxe no sistema educativo público.
A primeira fase de implantación chegará en setembro a 138 centros educativos galegos cun investimento que supera os 4 millóns de euros.
Na provincia de Lugo, promoveranse en seis colexios e institutos da Mariña; e tamén nos CEIP Virxe do Corpiño de Begonte, CEIP de Palas de Rei, CPI de Castroverde, IES Poeta Díaz Castro de Guitiriz, IES Xograr Afonso Gómez de Sarria e Escola de Educación Infantil Fingoi nº2 de Lugo.•