• O Deputado de Promoción Económica e Social destacou que este proxecto, financiado integramente pola institución cunha achega de 40.000€, ofrece formación, acompañamento e asesoramento gratuítos a empresarias e emprendedoras a través da Asociación de Empresarias de Lugo (AELU)
O Deputado de Promoción Económica e Social, Pablo Rivera Capón, presentou o 21 de xullo na Casa do Concello de Láncara o programa «Feminino rural. Evolución», financiado integramente pola Deputación con 40.000 euros. A Asociación de Empresarias de Lugo (AELU) leva a cabo esta iniciativa que ofrece de balde formación, acompañamento e asesoramento personalizado a mulleres empresarias e emprendedoras do rural para mellorar ou lanzar os seus negocios.
“A Deputación aposta pola creación de emprego, especialmente dos mozos e mozas da provincia e ás mulleres, como un factor imprescindible para dinamizar a actividade económica e contribuir a fixar poboación no territorio”, sinalou Rivera Capón.
No evento participaron o Alcalde lancarés, Darío Piñeiro López, e a técnica do proxecto, Úrsula Pérez. Esta fase de presentación xa tivo lugar en varias comarcas lucenses.
“Espero que as mulleres que participen poidan sacarlle o máximo partido a esta iniciativa. Ese é o obxectivo co que a impulsamos dende a Deputación, porque beneficiará ás propias emprendedoras, os seus negocios e proxectos, e será positivo para o emprego e para a economía”, asegurou Rivera.
Trala primeira toma de contacto, cada comarca contará con 25 prazas para crear sinerxías e fomentar o intercambio de experiencias. Na segunda fase, participarán unha selección de empresarias e emprendedoras por comarca. En total, 35 persoas recibirán formación e asesoramento personalizados para mellorar o funcionamento e a competitividade, e abrir novos mercados ou novos negocios.•
Cargando ...
