• As ventas da Mostra superaron ás da edición de 2019
Cando o día 5 de agosto a Tenente de Alcalde do Concello de Monforte, Gloria Prada, inauguraba a XXII Mostra de artesanía Artelemos 2022, na que participaron 23 profesionais da artesanía, provintes da comarca de Lemos, así coma outros puntos de Galicia e de España, notábase no ambiente que esta edición ía ser exitosa. e agora, recentemente acabada, cando toca facer balance, o resultado non pode ser máis satisfactorio. Artelemos mostrouse como unha feira consolidada, un bo escaparate para os pequenos obradoiros artesanais que están a traballar dende o rural galego, e que gardan a identidade de oficios tradicionais conxugándoa con tendencias actuais. A Mostra conta co apoio do Concello Monfortino, que aporta 12.000 euros para a súa organización. O Alcalde do Concello de Monforte, José Tomé Roca, acompañado pola 1ª Tenente de Alcalde, Gloria Prada, a Concelleira de Cultura, Marina Doutón, e o Concelleiro de Obras, Medio Rural e Servizos, José Luís Losada visitou a XXII Mostra de artesanía Artelemos 2022, durante a última xornada, logo de cinco días de exitosa actividade. Tras visitar os 23 stands que formaron parte da mostra, o Alcalde recolleu as valoracións dos artesáns participantes na mesma “e todos eles nos comentaron de que lles foi moi ben nos días de duración do certame e que levaron a cabo numerosas ventas”.
“As estimacións que facemos dende o Concello, e tras o que nos comentan os artesáns participantes, é que superamos as cifras da edición de 2019, tanto en número de público asistente como de ventas acadadas”, resaltou o Alcalde. Neste senso, o incremento estes días no número de turistas e de visitantes á cidade, contribúe á mellora dos datos acadados, con respecto a edicións anteriores.
En Artelemos 2022 participaron 23 profesionais da artesanía, provintes da comarca de Lemos, así coma outros puntos de Galicia, como Vigo, Ourense ou Noia, e incluso de España, como Murcia. Os obradoiros dirixidos a nenos e nenas, tamén resultaron ser todo un éxito, pois en todas as xornadas superáronse o número de prazas ofertadas para os mesmos. “Boa mostra do éxito de Artelemos, logo de dous anos de ausencia, é que moitos dos artesáns xa se comprometeron a participar na vindeira edición de 2023”, concluíu o Alcalde.•
