Xa está en servizo o novo acceso provisional a Folgoso do Courel, no que a Xunta investiu un millón de euros

A conselleira de Infraestruturas e Mobilidade, Ethel Vázquez, co delegado da Xunta en Lugo, Javier Arias, supervisou a apertura deste novo desvío da estrada LU-651. Foto GPXG.

A Xunta puxo en servizo o novo acceso provisional a Folgoso do Courel, no que investiu 1 millón de euros, e avanzou que en setembro decidirá a solución definitiva para a reconstrución da LU-651. A conselleira de Infraestruturas e Mobilidade, Ethel Vázquez, xunto co delegado da Xunta en Lugo, Javier Arias, supervisou a apertura deste novo desvío da estrada LU-651, que constitúe o acceso provisional a este municipio, alternativo ao treito cortado da vía autonomica, onde se produciu un desprendemento.
Vázquez Mourelle subliñou a axilidade da Xunta na execución desta obra, tramitada a través dunha declaración de emerxencia. Sinalou que este acceso comezou a construírse o 24 de maio e en tan só dous meses quedou executado nun contorno moi complexo, aumentando o orzamento previsto en máis de 117.000 €.
Agradeceu o traballo e a celeridade dos técnicos e da empresa, pois aínda que a data de apertura estaba fixada para hoxe, o avance nas obras permitiu xa que o novo acceso puidese ser empregado nos labores de extinción e de evacuación dos graves lumes nas pasadas semanas.
Sinalou que a pesar de que se trata dun desvío provisional, esta nova vía ofrece unha gran funcionalidade e permitirá o acceso a Folgoso tanto a vehículos lixeiros como a camións e autobuses que agora mesmo teñen o paso restrinxido.
Cómpre lembrar que esta vía dálle resposta ao desprendemento ocorrido o 20 de marzo nun treito de 200 metros da estrada que constitúe o principal punto de acceso a Folgoso desde Quiroga e que quedou reducida nesa zona de Santa Eufemia a un gran socavón.

Solución definitiva
A conselleira indicou que de xeito paralelo a Xunta traballa na solución definitiva para a reconstrución da LU-651.
Precisou que hai sobre a mesa diferentes opcións, desde a reconstrución da ladeira desprendida con recheos ata a execución dun túnel ou viaduto, pasando por unha vía cun trazado alternativo.
Adiantou que en setembro, cando o estudo de todos os factores estea concluído, tomarase unha decisión de forma coordinada co Concello e porase en marcha a solución definitiva.
Ademais apuntou que unha vez rematado este acceso provisional a Folgoso, a Xunta reactivará a finais de agosto ou comezos de setembro a reforma da LU-651 entre Seoane e Ferrería Vella, que suporá un investimento da Xunta de case 3,5 M€.•

Deixa unha resposta

Your email address will not be published.

Nova Anterior

A Xunta acometerá a rehabilitación integral do Instituto Francisco Daviña Rey

Seguinte Nova

Un verán moi seco, extremadamente
cálido e con baixas precipitacións

Últimas noticias sobre INFRAESTRUCTURAS

A %d blogueros les gusta esto: