O Xeocampamento do Courel puxo fin á serie de minicampamentos «Coñece Galicia»

• Boa acollida da terceira edición desta iniciativa de lecer
que a Xunta puxo en marcha no verán para rapaces e rapazas de 10 a 14 anos

A finais de agosto, rematou a serie de trece minicampamentos do programa «Coñece Galicia», que a Xunta deseñou como opción de lecer na natureza para rapaces e rapazas de 10 a 14 anos.

UNHA VINTENA DE RAPACES NO COUREL
Unha das últimas actividades deste programa autonómico, que xa chegou á súa terceira edición, desenvolveuse no municipio de Folgoso do Courel. Neste emprazamento, un grupo dunha vintena de mozos e mozas participou no programa «Xeocampamento», destinadas a afondar no coñecemento da contorna natural do Courel.

CON RUTAS A ENCLAVES DE INTERESE NATURAL
Dende o 29 de agosto ata o 2 de setembro, os participantes realizaron diversas rutas a lugares como o museo xeolóxico de Montefurado, ao Val das Mouras, á Devesa da Rogueira ou ao museo das Covas.

AFONDANDO NA NATUREZA A TRAVÉS DOS XOGOS
Tamén desenvolveron xogos para coñecer a natureza do Courel como xincanas e actividades cos monitores, así como outras pola noite para ver as estrelas.

«BOA ACOLLIDA»
A finais de agosto, a directora xeral de Xuventude, Participación e Voluntariado, Cristina Pichel, visitou a zona para coñecer a experiencia que estaban a vivir os participantes no Xeocampamento. Pichel puxo en valor a «boa acollida» que tivo esta edición dos minicampamentos, que ademais de impulsar unha programación de lecer para as mozas e mozos de entre 10 e 14 anos, permitiron dinamizar establecementos hostaleiros nos que tiveron lugar durante os meses de verán. •