A Deputación adxudicou por máis de 170.000 euros parte do equipamento da residencia de Ribas de Sil

• Os responsables provinciais cualifican o plan de residencias da Deputación como un “enorme avance na mellora das condicións de vida no rural”

O deputado de Promoción Económica e Social, Pablo Rivera. GPDL

A finais de agosto, a Deputación de Lugo aprobou un novo investimento relacionado co plan de residencias. A Xunta de Goberno do día 26 aprobou adxudicar dous dos cinco lotes do contrato de subministro de equipamento para o Centro de Atención a Maiores de Ribas de Sil por un importe de máis de 170.000 euros.
Segundo explicou en rolda de prensa o deputado de Promoción Económica e Social, Pablo Rivera, trala Xunta de Goberno, a aprobación deu luz verde á adxudicación dos lotes 1 e 5, correspondentes ao mobiliario xeral, adxudicado á empresa Industrias Hidráulicas Pardo S.L. por preto de 160.000 euros, e á cortinaxe, da que se ocupará Suministros Sanitarios SLU cun orzamento de case 13.000 euros. En ambos casos, a subministración realizarase nunha única entrega e nun prazo máximo de dous meses, unha vez asinado o contrato.
Coa adxudicación destes dous lotes, quedan tres para completar o subministro do equipamento necesario para a residencia de Ribas de Sil, que son os correspondentes aos equipos médicos e axudas técnicas; lavandería; e cociña. Rivera precisou que “se todo vai sobre o previsto, tamén se adxudicarán nas vindeiras semanas, porque as empresas que presentaron oferta xa están entregando a documentación solicitada polos servizos técnicos da área de Benestar para completar o procedemento e facer efectiva a adxudicación”.
O deputado de Promoción Económica e Social lembrou que o investimento total que fai a Deputación para dotar de equipamento ao Centro de Atención a Maiores de Ribas de Sil ascende a preto dos 332.000 euros.
Con esta adxudicación, “seguimos dando os pasos necesarios, en tempo e forma, para poder cumprir co compromiso de abrir esta residencia neste ano 2022”, destacou Rivera, quen lembrou que a Deputación tamén traballa para poñer en funcionamento en outono o centro de Navia de Suarna.
O responsable provincial de Promoción Económica e Social adiantou que “chegaremos ao 2023 cun total de nove centros públicos en funcionamento», en referencia aos localizados en Trabada, Pol, Ribadeo, A Fonsagrada, Castroverde, Pedrafita do Cebreiro, Meira, Navia de Suarna e Ribas de Sil. Rivera precisou que «7 destes centros foron abertos neste mandato, o que demostra claramente o noso compromiso cos concellos, o elevado esforzo inversor que estamos facendo e o alto ritmo de xestión deste Goberno e de toda a institución”. Dende o organismo provincial precisaron que estes nove centros contarán con máis de 300 prazas asistenciais e manterán uns 230 postos de traballo directos, a maior parte, ocupados por mulleres.
Por outra banda, Pablo Rivera recordou que o Goberno provincial segue traballando para crear outras nove residencias en Guitiriz, A Pontenova, A Pobra do Brollón, Portomarín, Folgoso do Courel, Ourol, Becerreá, Pantón e Cervantes. “Dende a Deputación de Lugo, en colaboración cos Concellos, estamos conseguindo un enorme avance na mellora das condicións de vida no noso rural, tanto nos servizos públicos como na actividade económica, o que axuda de maneira determinante a fixar poboación no territorio”, destacou Rivera. O deputado criticou que «a Xunta non está aportando absolutamente nada, incumprindo o que lle corresponde por Lei», xa que, «segundo o Estatuto de Autonomía, as competencias en servizos sociais son da Comunidade Autónoma».•

Deixa unha resposta

Your email address will not be published.

Nova Anterior

Comeza unha nova campaña no xacemento de Penas do Castelo en Salcedo

Seguinte Nova

O 15 de setembro é a data recomendada para o comezo oficial da vendima na Ribeira Sacra

Últimas noticias sobre SERVIZOS

A %d blogueros les gusta esto: