Club Lemos e SD Sarriana arrincan a tempada co ascenso a Terceira no punto de mira

Imaxe dun recente partido amigable do Club Lemos, coa segunda equipación homenaxe aos vellos uniformes do Lemos.

O tempo pasa moi rápido, dá a sensación de que os afeccionados lemistas e sarriáns aínda paladean o sabor agridoce da pasada campaña, cando despois de completar unha brillante primar fase, non foron capaces de conseguir o ansiado obxectivo do ascenso de categoría. Con todo, xa estamos en setembro, pasou todo o verán, e de novo arrinca unha nova tempada para os dous representantes do fútbol do sur de Lugo, que afrontan de forma ben distinta. Os lemistas estrean adestrador. Josito foi o elixido pola directiva que preside Óscar López para que se encargase da parcela deportiva, unha aposta arriscada por un histórico xogador que viviu a última época dourada do Club, na confianza de que sexa capaz de transmitir desde o banco toda a enorme sapiencia futbolística que tiña como xogador. Pero a tarefa non será sinxela, o equipo sufriu baixas importantes, e chegaron ata sete novos xogadores, polo que o rendemento do equipo será unha incógnita, a pesar de que no último partido disputado en Chantada deixou boas sensacións.
Fronte á incerteza que rodea ao proxecto do Club Lemos, a SD Sarriana apostou pola continuidade e mantén o grupo de xogadores diferenciais do equipo do pasado ano e as novas incorporacións son de calidade. O seu obxectivo é claro, levar ao equipo a Terceira División. Sen dúbida, por plantilla, son un dos principais candidatos ao ascenso. Con todo, desde o club da Ribela, queren ser prudentes, pois son coñecedores de que este ano, a categoría será moi dura, con rivais da talla do Boiro, Ordes, Betanzos ou Noia.
Os dous equipos comezan a liga a domicilio. Os lemistas visitan ao Fisterra, un equipo duro, sobre todo na súa casa, que a pasada campaña disputou a fase de ascenso, e que vén de gañar a supercopa da Costa e do Sar e que presenta como novidade exótica, a incorporación de dous xogadores exipcios Ibrahim e Islam. Pola súa banda, a SD Sarriana rende visita esta primeira xornada ao Unión de Rianxo, equipo recentemente ascendido, e que a priori, parece ser unha boa oportunidade para arrincar a primeira xornada con victoria. O Unión manexa un dos orzamentos máis baixos da categoría. Con todo, o pobo está envorcado co equipo, e espérase moita expectación no o Campo de Vilas o vindeiro sábado ás 18 horas.•

Deixa unha resposta

Your email address will not be published.

Nova Anterior

Nova fichaxe do Club Baloncesto Chantada

Seguinte Nova

O escritor Xabier Quiroga Díaz será o encargado do pregón da primeira edición da Festa da Vendima

Últimas noticias sobre DEPORTES

A %d blogueros les gusta esto: