• O número total de desempregados nas comarcas de Lemos, Chantada, Sarria e Quiroga ascende a 3.023
A Secretaria de Acción Sindical de CC OO Lugo ve con preocupación os malos datos do paro do mes de agosto, ao aumentar o número de desempregados nas comarcas de Lemos, Quiroga, Chantada e Sarria en 18 persoas cun total de parados de 3.023 ao final da etapa estival.
Desde o sindicato, amosan a súa preocupación, especialmente polo aumento en case un 8% no concello de Quiroga.
Mario Docasar, Secretario de Acción Sindical de CCOO Lugo, augura un outono «quente, xa que a esta desaceleración da creación de emprego súmanse unha inflación do 10, 4%, así como un bloqueo da negociación colectiva sendo a parte positiva a contratación indefinida ao pasar de ter un 10% dos devanditos contratos ata chegar o 40% de indefinidos».
Por outra banda, desde CCOO informan de que se viron na obrigación de levar a cabo diversas denuncias perante o xulgado do Social, e a Inspección de Traballo «ante as abusivas prácticas de varios empresarios do sector servizos aos que catalogan como ovellas negras por facer prácticas que vulneran a lexislación vixente, ao despedir no período de proba a traballadores sen pagarlle os salarios dos días traballados, (despois de realizar xornadas maratonianas de 12 e 14 horas) algo que están a utilizar nos últimos meses, estes mal chamados empresarios».
Desde CCOO insisten en reclamar «á Inspección Provincial que chame á orde a estas ovellas negras e erradique estas malas artes desta minoría que mancha o bo nome da clase empresarial das comarcas do Sur lucense». Con todo, Mario Docasar, Secretario de Acción Sindical de CCOO, confía que setembro sexa un mellor mes para o emprego como consecuencia da campaña da Vendima.•
